• Shpërndaje

1130 infektime të reja dhe 13 viktima në 24 orë

Shifrat e infektimeve ditore me Covid-19 njohin vetëm rritje nga dita në ditë. Ministria e Shëndetësisë raporton se në 24 orët e fundit u konfirmuan pozitiv me Sars-Cov2, 1 130 persona nga 4 539 testime të kryera, 41 raste më shumë se 1 ditë më parë.

Prania e koronavirusit gjendet në çdo qytet të vendit, me në krye Tiranën ku ndodhen thuajse gjysma e numrit të të infektuarve. Në 24 orë në kryeqytet u konfirmuan 535 persona me Sars-Cov2, e ndjekur nga Elbasani me 82, Kurbini me 59, Durrësi me 46 dhe Fieri e Vlora me 35 raste ditore.

I lartë mbetet edhe numri i viktimave si pasojë e koronavirusit. Në 24 orë humbën jetën 13 qytetarë. 6 prej tyre ishin nga Tirana, ndërsa pacientët e tjerë nga Korça, Lezha, Mirdita, Klosi, Mati, Delvina dhe nga Kruja. Më i riu mes tyre vetëm 28 vjeç. 

E rëndë paraqitet edhe situata në spitalet Covid. Aktualisht janë 431 pacientë nën kujdesin spitalor, 25 në terapi intensive nga të cilët 12 pacientë janë të intubuar. Në 24 orët e fundit u shëruan 656 qytetarë, ndërsa mbi 31,000 persona janë ende aktivë në të gjithë vendin.

Tv Klan