Kukësi synon kualifikimin ndaj Austrisë së Vjenës
Humbja 0-1 në përballjen e parë të Ligës së Europës në fushën e Austrisë së Vjenës nuk mund ta pengojë Kukësin për të synuar suksesin në sfidën e kthimit në orën 21:00 në “Elbasan Arena”.
Trajneri Hasan Lika e ka përgatitur skuadrën e tij për të bërë gjithçka që të kalojë në turin e tretë, ndërsa nuk pritet të ketë ndryshime në formacion në krahasim me duelin e parë.
Përballë kuksianëve do të jetë kundërshtari që fitoi 1-0 në stadiumin “Ernst Hapel”, por që pati edhe fat në pjesën e dytë.
“Ne kemi rezultatin 1-0 të ndeshjes së parë. Është e qartë se ne duam të kalojmë në turin tjetër dhe për këtë gjë, duhet të jemi plotësisht të përqendruar dhe duhet të përpiqemi të shënojmë gol sa më shpejt. Kukësi më befasoi në ndeshjen e parë me lojën e tij shumë të mirë, ndaj e dimë mirë se nuk do ta kemi të lehtë.”
Austria e Vjenës nuk ka mundur kurrë të fitojë në Shqipëri në kupat e Europës, në 1981 u mund 0-1 nga Partizani, në 1978 u mund 0-2 nga Vllaznia në Shkodër, ndërsa në 1971 barazoi 1-1 me Dinamon.
Tv Klan