Elseid Hysaj pranë rinovimit me Napolin
Ashtu siç pritej, Elseid Hysaj është shumë pranë rinovimit me Napolin. Mbrojtësi i djathtë i Kombëtares shqiptare, ka arritur të gjejë marrëveshjen me klubin italian dhe firma në kontratë pritet të hidhet brenda kësaj jave, madje përpara ndeshjes në kampionat kundër Milanit këtë të shtunë, siç raporton e përditshmja italiane “calciomercato.it”.
Në kontratën e re, përveç përmirësimit të kushteve financiare të shqiptarit, flitet se Napoli do të vendosë edhe një klauzolë shitjeje prej 50 milionë eurosh, për të larguar klubet e interesuara për Hysajn.
Gjatë kësaj vere 22-vjeçari u përfol se ishte objektiv i shumë skuadrave të mëdha europiane, veçanërisht Barcelonës, Bajernit të Mynihut dhe Arsenalit. Paraqitja mjaft e mirë e Hysajt sezonin e kaluar në Serinë A dhe me Kombëtaren shqiptare në “EURO 2016,” ka bërë që Napoli ta blindojë mbrojtësin e tij dhe të pranojë të heqë dorë nga ai, vetëm për një shumë të parefuzueshme parash.
Tv Klan