Obama bën fushatë për Clinton: E aftë për të qenë presidente
Pas një fundjave jo të mbarë për demokratët, Presidenti Barack Obama i bëri të martën një mbrojtje të fuqishme kandidates demokrate Hillary Clinton.
Në një fjalim në Filadelfia, ai mori në mbrojtje transparencën e fushatës së saj dhe aftësinë e saj për të qenë presidente, duke akuzuar republikanët se po “përhapin zemërim dhe urrejtje”.
Presidenti Obama u përpoq të bindë demokratët se ai i mbështet plotësisht përpjekjet e ish-Sekretares së tij të shtetit për Shtëpinë e Bardhë.
Ai u përpoq të mbushë boshllëkun e krijuar nga Clinton, e cila po pushon pas diagnostikimit me pneumoni. Shumë nga përkrahësit e demokratëve janë të shqetësuar se gara presidenciale po ngushtohet. Një sondazh i ri nga Universiteti Quinnipiac i jep Clinton një epërsi prej vetëm 5 % ndaj rivalit republikan Donald Trump në shtetin e Pensilvanisë.
Fushata e Trump iu përgjigj Obamës me një deklaratë ku lihej të kuptohej se Presidenti po u shmanget detyrave që ka në Shtëpinë e Bardhë duke bërë fushatë për Clinton./tvklan.al
Burimi: Voa