Messi çon Argjentinën te fitorja
Lionel Messi dha spektakël në sfidën kualifikuese të botërorit me Kolumbinë e zhvilluar në stadiumin “Bicentenario” të San Huanit.
Kapiteni ishte lojtari kyç në fitoren 3 – 0 që largon disi krizën tek Argjentina. Messi ishte autori i golit të parë me një goditje perfekte dënimi duke kaluar në avantazh përfaqësuesen e tij pas 10 minutash lojë. Golat e tjerë u realizuan përsëri me ndihmën e futbollistit të Barcelona.
Pasimet për Pratto dhe Di Maria ia bënë më të thjeshtë fitoren Argjentinës që ndodhet në vendin e pestë në grupin e Amerikës së Jugut.
Kjo ishte fitorja e parë pas 4 ndeshjesh me humbje e barazime. Kreu mbetet i Brazilit që mundi 2 – 0 Perunë. Gabriel Jesus dhe Renato Augusto ishin shënuesit në takimin e zhvilluar në Lima. Skuadra e drejtuar nga Tite ka vetëm një humbje në 12 ndeshje të zhvilluara deri më tani./ TV KLAN