Ekzekutohet në Fier Nelgert Pata
Ekzekutohet në Zhupan të Fierit, Nelgert Pata 34 vjeç, i njohur si një nga personat kryesorë të lidhur me një seri hakmarrjeje në Tiranë. Ngjarja ndodhi ne orën 13:50, në aksin rrugor Fier – Seman, në vendin e quajtur "Qenas".
Pata, banues në Tepelenë, po udhëtonte në mjetin e tij "Volkswagen" me targa AA 166 IY. Në atentat mbeti i plagosur edhe drejtuesi i mjetit, një 38 vjeçar që u dërgua në spital, i cili është tashmë jashtë rrezikut për jetën.
Ai dëshmoi në polici se autorët ishin dy persona që hapën zjarr me kallashnikov. Pak minuta më pas në fshatin Zhupan, në Fier, në vendin e quajtur "Mbikalimi" u gjetur i djegur mjeti tip "Benz" me portobagazh. Brenda mjetit polica gjeti edhe dy armë zjarri automatikë kallashnikov që dyshohet se janë përdorur në ngjarje.
Nelgert Pata është i njohur nga policia si person me precedentë penalë. Ai është dënuar nga Gjykata e Krimeve të Rënda me 16 vite burg për akuzën e shfrytëzimit të femrave për prostitucion në rrethana rënduese. Po ashtu dyshohet se është i përfshirë edhe në aktivitete dhe veprimtari kriminale në Shqipëri, të cilat nuk janë zbardhur nga policia.
Me 21 gusht të këtij viti, i shpëtoi një tjetër atentati në rrugën e Kavajës, pranë ish- parkut të autobusëve. Ai i plagosur, por që prej atentatit u zhduk dhe nuk u paraqit asnjëherë në polici për të dëshmuar.
Pata dyshohet se ka lidhje me Jani Aliajn dhe Renato Milloshin, dy të kërkuar për vrasjen e Elton Çiçës në maj të këtij viti.
Po kështu, në zinxhirin e ngjarjeve kriminale të kësaj vrasje dyshohet të jetë edhe plagosja e Andi Mustafarajt në fillim të tetorit në një lokal pranë ish-ekspozitës në Tiranë. Mustafaraj kishte patur lidhje të ngushta me Elton Çiçën.
Ai ka qenë i akuzuar disa herë së bashku me babanë e tij për prostitucion. Kur u plagos në muajin gusht kishte vetëm pak kohë që kishte dalë nga burgu./ TV KLAN