Partizani fiton me përmbysje
Takimin e parë në “Selaman Stërmasi” tifozët e Partizanit e ndoqën nën masa të rrepta sigurie. Stadiumi mbikëqyrej nga forca të shumta policie për të shmangur incidentet e mundshme me tifozët e Tiranës pas vendimit që të kuqtë të luanin në shtëpinë e rivalëve. Të kuqtë kishin përballë Vllazinë që vinte nga humbja me Kukësin javën e kaluar.
Partizani nuk e pati të lehtë me shkodranët që shënuan të parët me Elis Bakajn, i cili iu kundërpërgjigjur thirrjeve të tifozëve të Partizanit. Pas pushimit skuadra e Starovës e kërkoi më shumë golin duke realizuar fillimisht me bardhin dhe më pas me Bathën, në minutat e fundit.
Kjo fitore e mban të pandryshuar diferencën me 4 pikë me Kukësin kryesues që mundi me rezultatin 1 – 0 Teutën. Goli i vetëm i takimit u shënua nga Emini. Me të njëjtin rezultat Laçi fitoi me Tiranën. Të hënën do të luhen ndeshjet Korabi – Skënderbeu dhe Flamurtari – Luftëtari.
Tv Klan