Nga kuzhinier në burg… shqiptari që u detyrua të shiste drogë
Një shef kuzhine nga Shqipëria përfundoi në burg, pasi pranoi se kishte shkuar në Nottingham të Britanisë së Madhe për të shitur drogë në një lokal nate.
20 – vjeçari Ardit Shametaj tërhoqi vëmendjen e stafit në hyrje të lokalit të natës Pryzm, në rrugën Lower Parliament, pasi u përfshi në një zënkë me një person për pazare droge, mbrëmjen e Krishtlindjes. Për menaxherin e klubit, ai pranoi se kishte drogë me vete. Pas kontrollit, 20 - vjeçarit iu gjetën 5 pako me kokainë. Shametaj, i cili shkoi nga Shqipëria drejt Britanisë nëpërmjet Venecias, pranoi akuzat për posedim kokaine me qëllim shpërndarjen dhe mbajtjen e një dokumenti fals identifikimi. Gjykatësi Stuart Rafferty dha dënimin me 16 muaj heqje lirie për akuzat e drogës dhe 8 muaj për falsifikim dokumentesh. Rafferty e pati edhe një këshillë për të riun shqiptar:“Kur të shkosh në Shqipëri thuaji njerëzve atje se rrugët e Anglisë nuk janë të shtruara me flori, është totalisht e kundërta. Është e pashmangshme që do të deportohesh. Shpresoj të kesh mirësinë që të mos kthehesh më mbrapsht”.
[caption id="attachment_255083" align="aligncenter" width="783"]
Gjykata e Nottingham
[/caption] Shametaj e la familjen e tij në Shqipëri për të punuar si kuzhinier në Venecia dhe dërgonte i atyre rregullisht para.“Kur puna nuk shkonte më mirë, atij iu tha se në Britani do të kishte mundësinë të bënte para”,
shpjegoi para gjykatës avokati i tij mbrojtës, sipas të cilit, të riut iu tha se do të punonte në një lavazh dhe paratë do t’i merrte në dorë. Kështu, Shametaj udhëtoi me anë të një kamioni për në Francë e më pas në Londër. Fillimi nuk qe aspak i lehtë, derisa 20 – vjeçari u takua me një grup shqiptarësh. Ata e ftuan atë në një adresë, ku i morën pasaportën dhe i prenë foton për të bërë një kartë identiteti.“I thanë se nuk mund të largohej”,
shpjegoi avokati i tij,“i dhanë për të ngrënë dhe kishte një çati mbi kokë. Ishte e frikshme, por nuk kishte rrugë tjetër. E sollën në Midlands dhe i thanë se do të shiste drogë për ta. Ata kishin me vete armë zjarri dhe e kërcënuan se do të vepronin ndaj tij dhe familjes, nëse nuk bënte siç iu tha…”
Shametaj do të qëndrojë në burg derisa të deportohet.//tvklan.al