Digjet vetura e kryesocialistit në Lezhë
Një veturë “Mercedes- Benz” që përdorej nga ish-kreu i komunës së Kolshit në Lezhë, Andi Marku u dogj gjatë orëve të kësaj të diele në rrethana ende të paqarta. Ky i fundit ka kryer edhe funksione drejtuese vite më parë në Policinë e Lezhës.
Mjeti në pronësi të bashkëshortes së Markut ndodhej i parkuar në oborrin e Prefekturës. Roja i një godine aty pranë konstatoi zjarrin dhe lajmëroi zjarrfikësit dhe policinë. Me gjithë ndërhyrjen e shpejtë të zjarrfikësve, flaket dëmtuan automjetin. Në lidhje me ngjarjen, policia e Lezhës nisi hetimet për sqarimin e rrethanave të saj.
Nga hetimet paraprake të ekspertëve të policisë dhe zjarrfikësve është ngritur dyshimi se zjarri mund të jetë shkaktuar si pasojë e një defekti në sistemin elektrik të veturës. Një fakt i tillë është pohuar për hetuesit edhe nga ish-kreu i komunës, Kolsh, që më herët ka shërbyer edhe si oficer policie.
Sipas Markut prej pak ditësh automjeti i tij ka shfaqur probleme në sistemin elektrik por e ka nënvlerësuar situatën duke hedhur dyshime se kjo gjendje e mjetit të përdorur prej tij është bërë shkak i zjarrit që dogji edhe automjetin.
Pavarësisht kësaj, specialistët e policisë, presin aktin e plotë të ekspertimit të shërbimit zjarrfikës, ndërsa po hetojnë edhe pista të tjera lidhur me shkakun e rënies së zjarrit./ TV KLAN