SHBA bllokon mishin brazilian, po Shqipëria?
Shtetet e Bashkuara kanë pezulluar importet e mishit te kuq brazilian pas “shqetësimeve të përsëritura në lidhje me sigurinë e produktit të mishit”.
Disa shtete në botë ndaluan mishin brazilian në mars, kohë kur u publikua skandali i zyrtarëve brazilianë, të cilët paguanin ryshfete për të kaluar në dogana mish të kalbur ose të sëmurë me salmonelë.
Autoritetet amerikane kanë dalë në përfundimin se një pjesë e konsiderueshme e testeve të sigurisë së mishit të kuq brazilian kanë dështuar. Si rrjedhim 11% e produkteve të freskëta të mishit të viçit është refuzuar të hyjë në SHBA përgjatë tre muajve të fundit.
“Kushtet e ruajtjes së mishit dhe shëndeti jo i mirë i kafshëve” kanë qenë shqetësimet kryesore.
Që nga muaji mars, shqetësimi për mishin e importuar nga Brazili ka përfshirë Shtetet e Bashkuara, Kinën dhe Europën.
Edhe Shqipëria furnizohet me produktet e mishit te derrit dhe pulës nga Brazili.
Ne datën 15 maj, Autoriteti Kombëtar i Ushqimit njoftoi se bllokoi 26 ton mish pule nga Brazili tek i cili rezultoi me prezence salmonele. Aktualisht, sipas AKU-së çdo ngarkesë mishi që hyn në doganë nga Brazili, bllokohet dhe produkti u nënshtrohet analizave. Në rastet kur mishi nuk i kalon testet ai kthehet pas.
/Tv Klan