Greqia paralajmëron Turqinë: Do të shtypim këdo që na kërcënon
Tensionet me Turqinë ishin kryefjala e ditës që shënon 197-vjetorin e shpalljes së pavarësisë së Greqisë nga Perandoria Osmane. Këtë ditë zgjodhi ministri grek i Mbrojtjes Panos Kamenos për të lëshuar një paralajmërim të fortë për presidentin turk, Rexhep Taip Erdoan.
“Do të shtypim këdo që ve në pikëpyetje sovranitetin tonë kombëtar. Kushdo që ka ndërmend Perandorinë e madhe Osmane duhet të kujtojë 1821-shin, se si populli grek u përball dhe e mundi Perandorinë Osmane.”
Komentet i bëri gjatë paradës ushtarake në Athinë ku morën pjesë edhe Presidenti dhe Kryeministrin grek. Duke folur një ditë më parë nga Stambolli, presidenti turk Rexhep Taip Erdoan tha se do të rindërtonte Turqinë e Madhe, nëse është nevoja edhe me gjak. Nisja e këtij projekti – sipas tij – ishte sulmi i suksesshëm në Afrin. Marrëdhëniet mes Greqisë dhe Turqisë, dy partnerëve të NATO-s janë acaruar së tepërmi pas arrestimit në fillim të marsit të 2 ushtarëve grekë në një zonë të diskutuar kufitare mes dy vendeve, në fillim të marsit.
Tv Klan