Vritet në Londër 35-vjeçari shqiptar
Një shqiptar ka gjetur vdekjen mbrëmjen e së shtunës në Londër, pasi u godit me thikë. Ai është 35-vjeçari Edmond Jonuzi.
Sipas mediave britanike, 35-vjeçari u gjet i plagosur në gjendje të rëndë në Greens Lane, pranë stacionit Turnpike Lane, në veri të Londrës rreth orës 21:45, ku dhe ndërroi jetë. Autoritetet policore kanë nisur një hetim për vrasjen e të riut shqiptar, ndërsa pritet që trupi i tij t'i nënshtrohet ekspertimit mjeko-ligjor. Deri më tani nuk ka asnjë të arrestuar për ngjarjen e rëndë.
Detektivi Garry Moncrieff tha se vendi ku ndodhi ngjarja është tejet i populluar, ndaj u shpreh besimplotë se dikush mund të ketë parë apo dëgjuar diçka të dyshimtë, që mund të çojë në kapjen e autorëve të vrasjes së Jonuzit.
"I bëj apel çdo dëshmitari apo çdokujt që ka informacion për ngjarjen që t'i ndajë ato me policinë
", tha ai. Kjo është vrasja e 74 në kryeqytetin britanik që prej nisjes së 2018-s. Dyshimet paraprake të hetuesve janë se 35-vjeçari shqiptar mund të ketë mbetur viktimë e një përplasjeje mes dy grupeve./tvklan.al