Kukësi beson te kualifikimi
Kukësi do të luajë me gjeorgjianët e Torpedo Kutaisi në turin e tretë të Europa League. Pavarësisht respektit shikohet si një kundërshtar i kalueshëm për drejtuesit e klubit shqiptar. Drejtori sportiv Nderim Nexhipi i kontaktuar nga TV Klan mendon se Kukësi mund të kualifikohet në turin play off, ku mbërriti në sezonin 2013-2014.
“Do të jetë ndeshje e vështirë po besoj që jemi të gatshëm për këtë ndeshje. Kemi shumë kualitet për të kaluar ekipin e Torpedos dhe këtë duhet ta tregojmë të enjten në fushë”, tha Nderim Nexhipi.
Diferenca në renditjen e UEFA-s është 187 pozicione. Torpedo eliminoi në turin e dytë të Europa League, Vikingur e Ishujve Faroe duke shënuar 7 gola në dy takime dhe pa pësuar asnjë.
Ekipi gjeorgjian e nisi nga Champions League garën Europiane këtë sezon, ku nuk ia doli përballë Sheriff Tiraspol. Torpedo Kutaisi është në aktivitet prej muajit Shkurt kur nisi kampionati në Gjeorgji.
Tv Klan