Vjen ambasadori i ri i Katarit, Meta: Bashkëpunim në transportin ajror
Ambasadori i ri i Katarit në vendin tonë, Ali bin Hamad Al-Marri paraqiti letrat kredenciale tek Presidenti Ilir Meta.
Kreu i shtetit, i cili pranoi letrat kredenciale, vlerësoi marrëdhëniet e mira mes dy vendeve, si dhe shprehu mirënjohjen për ndihmën e madhe financiare dhe mbështetjen e projekteve të shumta zhvillimore nga Katari në Shqipëri.
Në mënyrë të veçantë, Presidenti Meta iu referua mbështetjes së dhënë gjatë përballimit të krizës së Kosovës në vitin 1999, por edhe për përballimin e fatkeqësive të tjera natyrore dhe vështirësive sociale në zona të ndryshme të vendit.
Duke iu referuar potencialeve të mirënjohura investuese të Katarit, Presidenti Meta shprehu besimin se ambasadori Al-Marri do t’i japë një shtytje të re bashkëpunimit ekonomik midis dy vendeve dhe do të nxisë investimet e kompanive të Katarit në Shqipëri.
“Interesi për bashkëpunim në fushën e transportit ajror, do t’i jepte një nxitje të mëtejshme këtyre investimeve, por edhe shkëmbimeve turistike e do të rriste kontaktet e drejtpërdrejta midis dy vendeve
“, theksoi Presidenti Meta.
/tvklan.al