Dalin në ankand objektet e anijes së mbytur “Titanik” (06 Janar 2012)
Mbi 5000 objekte të anijes së famshme Titanik do të nxirren në ankand në Nju Jork në 100 vjetorin e mbytjes së gjigandit detar. Vlera fillestare e këtyre objekteve në total arrin në 189 milion dollarë, për shkak të vlerave historike që ato mbartin.
Të gjitha këto objekte nisën të nxirreshin nga thellësia e oqeanit vetëm dy vite pasi u lokalizua vendi ku u fundos Titaniku,ndërsa koleksionimi i tyre ka vazhduar përgjatë 25 viteve të shkuara. Gjatë kësaj periudhe ato janë mbledhur nga Shoqata për Ruajtjen e Objekteve të Titanikut, për të cilën do të shkojnë një pjesë e të ardhurave të përfituara nga ky ankand.
Objektet do të ekspozohen në një sallë ankandesh në Nju Jork, ku përmes një projeksioni 3 dimensional do të shfaqen pamje të rindërtuara të anijës gjigande të transportit të pasagjerëve të mbytur më 15 prill të vitit 1912 në oqeanin Atlantik pas përplasjes me një ajsberg./tvklan.al