Edicioni i lajmeve 22 Shkurt 2010, ora 19:30
Titujt kryesorë 22 Shkurt 2010, ora 19:30
Mbërrin delegacioni i KiE, konflikti drejt zgjidhjes
Delegacioni i Asamblesë Parlamentare të Këshillit të Europës sapo ka përfunduar takimin më shumë se 5 orësh në presidencë me kreun e shtetit, kryeministrin Berisha dhe kryesocialistin Rama, në përpjekje për t’i dhënë fund ngërçit politik. Ardhja e tij në Tiranë pritet t’i japë zgjidhje konfliktit.
Bello: Hyrja dhe dalja në Kuvend, skenar që dëmton PS
Deputeti socialist Marko Bello pranon se PS do të jetë në Kuvend përpara skadimit të afateve kushtetuese të vlefshmërisë së mandateve te tyre. Sipas tij, çdo skenar për të vijuar më pas bojkotin është një politikë dritëshkurtër dhe në dëm të interesave të PS.
Skenografi ekskluziv i Tv Klan merr notën më të lartë në “San Remo”
Gaetano Castelli, skenografi ekskluziv i TV Klan, ka mahnitur të gjithë me atë çka paraqiti sivjet në festivalin e San Remos. Mjeshtri i madh italian i skenës ka firmën e tij ekskluzive në të gjithë spektaklet e TV Klan, ndërsa studio e re e lajmeve është projekti i tij më i afërt.
Tragjedi në Austri, përplaset autobuzi me kosovarë. 6 viktima
Përfundon në tragjedi një udhëtim turistik i një grupi kosovarësh ne Austri. Autobuzi, me të cilin ata ishin nisur drejt Vjenës dhe më pas Gjermanisë, është përplasur me dy kamionë, duke shkaktuar 6 të vdekur dhe 36 të plagosur, shumica kosovarë.
Tentativë për grusht shteti në Turqi, arrestohen 40 persona
Autoritetet turke kanë zbuluar një plan për grusht shteti, në të cilin janë përfshirë të paktën 40 persona, 14 prej tyre janë zyrtarë të lartë të ushtrisë. Kryeministri Erdogan tha se ata kishin planifikuar një atentat edhe kundër tij.
“Akademia e Yjeve”, edicioni i 5-të i spektaklit në Tv Klan
Në Tv Klan ka nisur faza e dytë e përzgjedhjes së kandidatëve që do marrin pjesë në spektaklin “Akademia e Yjeve”, një talent shoë që këtë vit shënon edicionit e vet të pestë. Veç numrit të madh të kandidateve meshkuj, ky sezon afron shumë surpriza.
Edicioni i lajmeve Tv Klan – 22 Shkurt 2010, ora 19:30 – Spikere: Sonila Meço