• Shpërndaje

Vetëm pak ditë pas miratimit të ligjit antigomone në Parlament dhe sekuestrimit të mjeteve lundrues, disa skafistë vlonjatë kanë marrë peng Shefin e Komisariatit të Vlorës, Sokol Koçiu, i njohur në luftën kundër krimit dhe transportit ilegal të klandestinëve.

Ndërsa po ecte në rrugën e Skelës disa pronarë të gomoneve të sekuestruara, i kanë dalë përpara dhe duke ushtruar forcë e kanë detyruar të shkojë me ta. Menjëherë kanë mbërritur forcat e policisë por për të shmangur ndonjë incident komisar Koçiu i ka larguar të gjithë policët duke e lënë veten në duart e skafistëve të cilët e kanë dërguar në det të hapur.

Në det, skafi ku qëndronte i marrë peng Koçiu ka kaluar pranë anijes së batalionit italian “San Marko”, të cilët e kanë shoqëruar me sy. Sokol Koçiu i angazhuar me ligjin antigomone, para dy ditësh ka qënë në Durrës për të bashkërenduar punën me Guardia di Finanza si rezultat i së cilës u sekuestruan 6 gomone.

Pasi kanë qëndruar për katër orë ne Ishullin e Sazanit skafistët e kanë detyruar Koçiun të lidhej me vartësit e tij dhe të urdhëronte lirimin e gomoneve të tyre. Vetëm pas kësaj komisari është lënë i lirë dhe u shoqërua në breg. Rreth orës 14:30 pasi ka shkuar në zyrën e tij Koçiu është lidhur me Ministrin e Rendit Petro Koçi i cili nga ana e tij shprehu besim të plotë tek personaliteti dhe profesionalizmi i tij./tvklan.al

Gazetar : Eduart Frangaj