Sport vendi, volejboll, futboll – (28 Shtator 1999)
Arkiva Lajme – Tv Klan 1999
Ka nisur sot paradite në sallën sportive “Fahrie Hoti” të Tiranës, Kupa e Federatës Shqiptare të Volejbollit për Femra. Marrin pjesë 6 skuadrat më të mira të sezonit të kaluar, Teuta, Studenti, Lushnja, Partizani, Tirana dhe Dinamo. Ndeshjet do të vazhdojnë 5 ditë.
Në takimin e parë Studenti ka fituar me vështirësi 3-2 ndaj Tiranës. Duke u treguar e kujdesshme Studenti fiton setin final 17-15 dhe krejt takimin 3-2. Lushnja fiton 3-0 ndaj Partizanit, duke mbyllur takimet e paradites. Pasdite është luajtur takimi Teuta-Dinamo. Teuta e Durrësit kampione në fuqi ndërsa Dinamo e drejtuar nga Kreshnik Tartari kërkon të rikthehet në famën e saj. Takimi u mbyll 3-1 për Teutën.
Sportdashësit shqiptarë do të kenë rastin të ndjekin nëpërmjet ekranit të televizorit futbollistët shqiptarë që luajnë në ligën e Kampioneve të Evropës. Nesër Maribor e Sllovenisë ekipi ku luajnë dhe dy shqiptarë Kliton Bozgo dhe Geri Çipi do jetë përballë skuadrës italiane Lazio. Është hapur përsëri mundësia e futbollistit të përfaqesueses shqiptare Altin Haxhi për tu transferuar te skuadra spanjolle Celta Vigo./tvklan.al