Operacionet policore në Tropojë dhe Has ( 4 Tetor 1999)
Operacion antidrogë në rrethin e Tropojës. Sot Zyra Rajonale e luftës kundër drogës në bashkëpunim me forcat e ndërhyrjes së shpejtë, në fshatin Shushicë të rrethit të Tropojës asgjesuan 200 rrënjë bimë narkotike e kanabis sativa të mbjella në parcelën e një shtetasi.
Sipas të dhënave nga Ministria e Rendit Publik në disa zona veriore të vendit si në rrethin e Shkodrës, Tropojës dhe Lezhës është evidentuar kultivimi i bimëve narkotive. Po në këtë fshat Policia kapi dhe bllokoi 3 mitralozë të lehtë, 7 automatikë, 14 pushkë, 20 granata mbrojtëse, 10 granata mësymëse dhe një sasi fishekësh.
Nga banorët e fshatit Kishaj të rrethit të Hasit dje u gjet kufoma e një vajze bën të ditur policia kufitare e këtij rrethi. Sipas një deshmitari okular kufoma është e një vajze rreth moshës 20 vjeç e veshur me uniformë të UÇK-së. Në vendngjarje kanë shkuar ekspertët e Komisariatit të Policise së Rrethit. Deri më tani nuk është bërë akoma i njohur identiteti i saj sepse kufoma është e dekompozuar. Ky është rasti i parë i gjetjes së një kufome në afërsi të kufirit që pas përfundimit të konfliktit në Kosovë./tvklan.al