Krimi nëpër rrethe (7 Dhjetor 1999)
Një 20 vjeçare nga Kruja ka vdekur sot në mëngjes pasi kishte pirë lëndë helmuese. Irena është gjetur në mëngjes nga familjarët në gjendje të rëndë dhe pse u dërgua në spital helmi i rëndë i mori jetën. Edhe pse grupi hetimor i Krujës shkoi menjëherë në shtëpinë e viktimës, shkaqet nuk janë zbuluar ende.
6 kamiona me mall kontrabandë janë bllokuar në orët e para të ditës së sotme në pikat kufitare të Shkodrës në afërsi të fshatit Grizhë. Pas kontrollit të forcave speciale u zbulua se nga 4 automjetet ishin të ngarkuar me 60 ton miell, hime, grurë për bagëti, thasët e të cilëve ishin me etiketë jugosllave dhe malli nuk shoqërohej nga asnjë lloj dokumenti ndaj për të u vendos masa e sekuestrimit.
Në Berat zbulohet një qendër falsifikimi dokumentash. Në shtëpinë e një shtetasi, Policia gjeti disa aparatura që plastifikonin pasaporta apo dokumenta të tjera, vula të ndryshme si dhe disa pasaporta falso të sapoprodhuara të gatshme për shitje. Ndaj pronarit të tyre Policia e Beratit mori masën e arrestit si dhe sekuestroi dokumentat fallso./tvklan.al
Gazetar: Eduart Frangaj