Berat, shpërthim bombe në stacionin e autobuzit – (9 Maj 2000)
Arkiva Lajme – Tv Klan 2000
Tre të plagosur nga të cilët një grua në gjendje më të rëndë ka qenë pasoja e shpërthimit të një bombe sot në Berat. Një adoleshent 15-vjeçar gati shkaktoi tragjedinë kur e hodhi granatën në stacionin e autobuzit Berat-Uznovë. Sipas ekspetëve të policisë pasojat kanë qenë të vogla vetëm sepse granata ka qenë difensive.
Ngjarja ka ndodhur rreth orës 11 e 30 minuta kur adoleshenti Mikel Çizmja e hodhi armën shpërthyese ndërsa ishte duke udhëtuar me një autoveturë në lagjen “Barrikadë”. Bomba krijoi tmerr dhe panik ndër dhjetra qytetarë që ndodheshin aty në momentin e shpëthimit. Për pasojë u plagosën dy qytetarë ndërkohë që një grua e moshuar me plagën më të rëndë u dërgua urgjent për mjekim në spitalin e qytetit.
Policia tha se 15-vjeçari Çizmja u largua menjëherë nga vendngjarja dhe po punohet për kapjen e tij. Agjentët e policisë po hetojnë rreth motiveve që e shtynë autorin të kryente këtë vepër penale. Sulmi me bombë në një vend të populluar si stacioni i autobuzit është një rast i rrallë për policinë shqiptare./tvklan.al
Gazetare – Ornela Bego