Ministri Italian i Mbrojtjes në Shqipëri – (15 Qershor 2000)
Arkiva Lajme – Tv Klan 2000
Në krah të Ministrit të Mbrojtjes Italiane Matarela, ministri shqiptar i mbrojtjes Luan Hajdaraga ka anashkaluar pyetjen për statusin e ardhshëm të kompanisë greke të vendosur në Yzberisht të Tiranës. Hajdaraga tha se Italia dhe Greqia janë vende mike dhe aleate në kuadër të Natos, duke lënë të nënkuptojë se prezenca e ushtarëve të këtyre vendeve në Shqipëri do të vazhdojë dhe në të ardhmen.
Megjithëse në përbërje të Natos, Italia dhe Greqia gjatë krizës në Kosovë nuk kanë reaguar pozitivisht ndaj sulmeve ajrore mbi Serbinë. Matarela dhe Hajdaraga nënshkruan sot memorandumin e mirëkuptimit, ndërtimin e pistës ajrore në Vlorë dhe ndihmën për akademinë e forcave ajrore po në këtë qytet.
Ministri i Mbrojtjes Italiane Matarela, u prit në një takim të veçantë edhe nga kryeministri Ilir Meta. Kryeministri Meta ka vlerësuar rritjen e shkëmbimeve ekonomike të investimeve italiane dhe rritjen e pranisë italiane në Shqipëri si shumë të rëndësishme për rajonin e Ballkanit./tvklan.al
Gazetar – Vladimir Lame