Shtyhet seanca për 2 fëmijët Avdyli – (2 Korrik 2000)
Lajme Arkiva – Tv Klan 2000
Shtyhet për të mërkurën vendimi i Gjykatës së Tiranës mbi pezullimin apo jo të vendimit bashkiak për fëmijët e Erieta dhe Dritan Avdylit. Sot në zyrën e gjyqtares Mimoza Kajo, janë paraqitur në seancën parapërgatitore vetëm avokati dhe vëllai i Dritan Avdylit. Përfaqësuesit e këshillit të kujdestarisë në Bashkinë e Tiranës nuk janë paraqitur.
Kjo seancë ishte kërkuar nga vetë Dritan Avdyli, për të rrëzuar vendimin e këshillit të kujdestarisë, i cili një javë më parë vendosi që fëmijët e çiftit Avdyli, të qendrojnë tre ditë e gjysmë tek gjyshërit nga babai dhe tre ditë e gjysmë tek gjyshërit nga nëna.
Avokati i Dritan Avdylit, Hysni Beti, ka kërkuar rrëzimin e këtij vendimi, pasi sipas tij, duhet të jetë gjykata që e vendos këtë dhe nuk është kompetencë e bashkisë. Në mungesë të palës tjetër, gjyqtarja vendosi ditën e mërkurë për vendimin gjyqësor. Njëkohësisht për këtë çështje, po në Gjykatën e Tiranës, gjyqtari Medi Bici, ka marrë një kërkesë nga mbrojtja e Dritan Avdylit, për pezullimin e ekzekutimit të vendimit për ditët e ndarjes së dy fëmijëve Avdyli në dy shtëpi./tvklan.al
Gazetar – Eduart Frangaj