Talat Xhaferi rizgjidhet kryeparlamentar i RMV
Merr 62 vota pro dhe 43 kundër
Me 62 vota “për”, 43 “kundër” dhe asnjë “të përmbajtur” Talat Xhaferi sërish zgjidhet në krye të Kuvendit të Maqedonisë së Veriut. Për zgjedhjen e tij votuan 46 Deputetët e koalicionit “Mundemi” që udhëhiqet nga LSDM-ja, 15 nga BDI-ja dhe 1 nga PDSH-ja e Menduh Thaçit. Deputetët e VMRO-DPMNE-së kanë braktisur sallën e Kuvendit derisa Xhaferi jepte deklaratën solemne.
Para fillimit të seancës konstituive duket se janë ulur tensionet brenda BDI-së. Dy deputetët e përfolur që kanë shfaqur pakënaqësi rreth ndarjes së resorëve brenda BDI-së, janë shprehur pro kandidaturës së zotit Xhaferi. Nga opozita shqiptare ishin të prerë se nuk do ta votojnë Talat Xhaferin.
Seanca konstituive e Parlamentit të Maqedonisë së Veriut përfundoi me zgjedhjen e Komisionit për Zgjedhje dhe Emërime. Kryetar i këtij Komisioni u zgjodh Kostadin Kostadinov, ndërsa zëvendësi i tij Muhamed Zekiri, të dy nga LSDM-ja.
Tv Klan