Covid vazhdon “marshimin”
Prej disa ditësh në të gjithë globin numri i rasteve më Covid-19 po rritet në mënyrë të frikshme. Franca ndodhet në një situatë kritike ku 7 mijë e 100 raste të reja janë regjistruar në 24 orët e fundit duke e çuar totalin e të infektuarve në 381 mijë. Javën e kaluar ministrat e Shëndetësisë shqyrtuan mundësinë për të rikthyer edhe njëherë karantinën, por kjo mundësi u hodh poshtë, pasi do të shkaktonte dëme edhe më të mëdha ekonomike.
Italia ka shënuar një ulje të lehtë të shifrave të të prekurve nga Covid, krahasuar me një ditë më parë. Në 24 orët e fundi janë regjistruar 1458 raste të reja, që e çojnë numrin total të të prekurve në 287.297 që nga nisja e pandemisë. India vijon të qëndrojë në vend të dytë ku vetëm në një ditë janë regjistruar 93 mijë raste të reja duke e çuar totalin në 4.8 milionë të infektuar. Rastet më të larta janë në shtetin më të madh të Indisë, Maharashtra si dhe Mumbai.
Në Brazil numri mbartësve me Covid-19 ka arritur në 4.3 milionë, shifra e tretë më e lartë në botë. Ky vend ka numrin më të lartë të vdekjeve në Amerikën Latine, me rreth 131,000 deri më tani. Ndërkohë SHBA ka regjistruar gati një të katërtën e numrit të përgjithshëm të rasteve të koronavirusit në botë më shumë se gjashtë milion. SHBA ka numrin më të lartë të regjistruar të vdekjeve në botë nga Covid-19, me më shumë se 198 mijë viktima.
Izraeli ka marrë vendimin që të rikthejë edhe njëherë karantinën pas rritjes së rasteve. Duke filluar nga 18 Shtatori për rreth tre javë vendi do vendoset në izolim, por këtë herë do të jetë ndryshe ku bizneset, dyqanet , farmacitë dhe supermaketet do të qëndrojnë të hapura me orare të reduktuara, ndërsa shkollat do të mbyllen. Ky vendim erdhi pasi në spitale ndodhen shumë të shtruar në repartet e kujdesit intensiv.
Hapja e shkollave, por edhe pasojat e lëvizjes së madhe të turistëve gjatë sezonit veror renditen ndër arsyet e shtimit të infektimeve. Aktualisht koronavirusi ka prekur 29.2 milionë njerëz në të gjithë globin, ndërsa e ka çuar totalin e atyre që kanë humbur jetën në 928 mijë.
Klan Plus