• Shpërndaje

Policia gjen të djegur makinën e autorëve

Atentati që u bë në Fushë Krujë pasditen e së mërkurës, ku mbeti i plagosur Ervin Kodra, kishte si objektiv ekzekutimin e Durim Bamit. Kjo për faktin se atentatorët kanë qëlluar drejt vendit ku ndodhej shoferi, që sipas Policisë ishte pikërisht Durim Bami.

Burimet nga grupi i hetuesve thanë se ky i fundit e ka kuptuar që iu bë pritë dhe ka devijuar rrugën, por plumbat kanë kapur kushëririn e tij, Ervin Kodrën.

Atentatorët kanë qëlluar disa herë, por më pas u larguan drejt fshatit Valias. Pikërisht në këtë zonë, u gjet edhe makina që shikoni në këto pamje, e shkrumbuar tërësisht. Brenda automjetit Golf 5 u gjetën edhe armë zjarri.

Për ngjarjen policia ka marrë në pyetje edhe Durim Bamin dhe Ervin Kodrën, të cilët janë shprehur se nuk i njohin personat që u bënë atentat.

Ata i thanë policisë se nuk kanë informacion kush kërkoi t’i vriste. Policia nga ana e saj ka pyetur edhe disa persona të tjerë në Nikël dhe Fushë Krujë. Durim Bami është një emër mjaft i përfolur që ka pasur disa herë probleme me drejtësinë.

Ai është arrestuar nga policia për armëmbajtje pa leje, plagosje dhe kërcënim, por që më pas ka dalë nga burgu.

Tv Klan