Vaksinimi anti-covid nis javën tjetër në vendet e BE
EMA pritet të japë aprovimin për “Pfizer” më 23 Dhjetor
Agjencia Europiane e Barnave EMA pritet të japë aprovimin për përdorim urgjent të vaksinës Pfizer/BionTech më 23 Dhjetor.
Lajmin që e publikuar fillimisht në të përditshmen gjermane Bild që citonte burime pranë Komisionit Europian, e konfirmoi në një konferencë për shtyp edhe ministri gjerman i Shëndetësisë.
“Jemi optimistë se rreth datës 23 do të jepet leja dhe ky është lajm i mirë për gjithë vendet e BE-së, pasi së bashku do të punojmë bashkë me kompanitë farmaceutike për ta shpërndarë njëherësh në gjithë unionin”.
Si datë për nisjen e injektimit të dozave të para të vaksinës, kreu i shëndetësisë gjermane përmendi datën 26 të këtij muaji, por sipas tij ekziston mundësia që vaksinimi të nisë që për Krishtlindje.
Në të njëjtën datë, dozat e para do t’i injektohen shtresave të rrezikuara në të 27 vendet e unionit. Këtë e konfirmuan edhe autoritetet italiane. Të paktën 100 milionë doza do të injektohen brenda 3 muajve të parë të 2021-shit.
Vaksinimi me vaksinën Pfizer/BionTech nisi edhe në Shtetet e Bashkuara e Kanada. Doza e parë iu injektua edhe Sekretarit Amerikan të Mbrojtjes në detyrë, Kristofer Miller.
Tv Klan