Moti i keq, shton aksidentet në rrugë
Përplasen makinat në aksin Berat – Poliçan
Moti i keq ka shtuar edhe aksidentet në rrugët e vendit. Një përplasje e fortë mes dy automjeteve ndodhi paraditen e sotme në aksin Berat – Poliçan.
Një furgon dhe një automjet janë përplasur ballë për ballë pranë vendit Uznovë e Madhe. Furgoni u përmbys ndërsa automjeti tjetër përfundoi në kanal me dëmtime të shumta.
Është dashur ndërhyrja e zjarrfikësve për të nxjerrë nga makina drejtuesin e automjetit i cili kishte marrë lëndime. Një tjetër aksident ndodhi rreth orës 9.40 në aksin rrugor Lushnje – Berat ku janë përplasur 2 automjete.
Të dy drejtuesit e mjeteve kanë marrë dëmtime dhe janë dërguar në spitalin e Lushnjes ku po marrin trajtimin e mjekëve.
Tv Klan