Elbasan, operacioni antidrogë, kapen 200 kilogramë kanabis – (5 Prill 2001)
Lajme Arkiva – TV Klan 2001
200 kilogramë drogë e llojit kanabis sativa është kapur nga policia në orën 2 të natës, në postbllokun e Mirakës në Elbasan. Droga e presuar u gjend në një makinë tip IVEKO, me targa Fieri dhe kishte për destinacion Greqinë. Sipas shefit të antidrogës, në zyrën rajonale të drejtorisë së policisë në Elbasan, Ylli Shazivari, kishte një javë që makina IVEKO me targa të Fierit, ishte në survejim. Për këtë qëllim ishte organizuar puna në postblloqe për kapjen e autorit.
Drejtuesi i automjetit Ardian Basholli 30-vjeç, banor i lagjes “Çlirimi”, në rrethin e Fierit është ndaluar menjëherë, për të cilin u vendos masa e arrestit. Për transportimin e drogës nga Fieri për në Greqi, autori e maskonte atë me disa arka me pula të gjalla. Sipas spesialistëve të antidrogës në Elbasan, rrethi i Fierit mbetet kryeqendra e prodhimit të drogës në Shqipëri./tvklan.al
Gazetar – Eduart Frangaj