Agolli fiton Kupën e Azerbajxhanit
Ansi Agolli fitoi edhe Kupën në Azerbajxhan pas suksesit në kampionat. Qarabag triumfoi me rezultatin 1 – 0 në derbin me Neftçi Baku duke marrë këtë trofe për herë të katërt.
Një ndeshje e fortë ishte finalja e zhvilluar në kryeqytetin azer dhe e përcaktuar vetëm në minutën e fundit të pjesës së dytë shtesë.
Një krosim i Ansi Agollit u shfrytëzua nga Miguel Marcos Madera duke vendosur fitoren e vështirë të Qarabag. Ky është trofeu i gjashtë për futbollistin shqiptar, i cili u transferua në Azerbajxhan në vitin 2010 duke u kthyer në një lojtar kyç në sukseset e ekipit.
Ansi Agolli tani do t’i bashkohet përfaqësueses që është grumbulluar prej të hënës në kampin përgatitor në Austri, për të qenë gati edhe për miqësoren me Katarin. /TV KLAN