Arrestime në Fier, kapen grabitësit – (21 Prill 2001)
Lajme Arkiva – TV Klan 2001
Policia e Fierit, ka arrestuar Hajredin Tabakun 33 vjeç, lindur dhe banues në Velabisht të Beratit dhe Vladimir Abazin 36 vjeç, lindur në Skrapar dhe banues në Berat. Arrestimi i tyre u bë sepse në aksin rrugor Fier-Vlorë, u kapën duke transportuar me makinën e tyre dy shtetase të huaja të hyra ilegalisht në Shqipëri. Ata në bashkëpunim i kishin blerë për pesë milion lireta në Durrës, me qëllim shitjen në Itali për prostitucion, një moldave dhe një ukrainase.
Në një operacion të përbashkët të forcave të policisë së komisariatit të Fierit dhe Gjirokastrës, në qytetin e Patosit u kapën autorët e vjedhjes me armë të ndodhur më datën 16.04.2001, në aksin rrugor Gjirokastër-Kakavijë. Ata janë Ardit Cenko 19 vjeç dhe Leonidha Gremi 26 vjeç, si dhe shoku i tyre Robert Goxhaj 20 vjeç. Gjatë kontrollit të banesës, Ardit Cenkos iu gjet dhe iu sekuestrua 5.8 kilogram mariuhanë në katër pako dhe 100 fishekë.
Gjithashtu është arrestuar në flagrancë Pëllumb Goxhaj 42 vjeç, lindur në Patos dhe banues në Peshtan të Fierit, sepse ka prodhuar dhe tregtuar armë zjarri artizanale, në formën e stilolapsit, bastunit dhe të kuqit të buzëve. Në kontrollin e shtëpisë iu gjetën pjesë të veçanta të këtyre lloj armëve, një sasi baruti dhe një automatik./tvklan.al