Arrestohet nipi i Isa Çopës, iu gjet lëndë narkotike me vete
Nipi i ish – agjentit të SHISH të vrarë në Durrës, Isa Çopa, ka përfunduar në prangat e policisë për trafik ndërkombëtar të lëndëve narkotike, ndërsa nën hetim është vënë dhe babai i tij, vëllai i të ndjerit Halit Çopa, 56 – vjeç.
Arrestimi i 23 – vjeçarit Klevis Çopa u bë në portin e Durrësit, teksa po bashkëpunonte me Julian Shaqjan, 25 – vjeç, marinar në një nga tragetet e anijes Durrës – Bari, për kalimin e afro 600 gramë lëndë narkotike, e llojit heroinë.
Droga, sipas policisë, u gjet në çantën e dorës të Julian Shaqjas, në pikën e kalimit kufitar të pasagjerëve, në tentativë për ta kaluar drejt Italisë.
Krahas arrestimit të dy të rinjve, policia shpalli në kërkim edhe 24 – vjeçarin me iniciale G.Ç, kushëri i Klevisit, i konsideruar si organizator i trafikut të lëndës narkotike.
Policia thotë se ka filluar procedimin penal në gjendje të lirë edhe ndaj Halit Çopës, 56 – vjeç, babai i Klevisit dhe vëllai i ish – agjentit të SHISH -it, pasi gjatë kontrollit të ushtruar në banesën e tij, ka kundërshtuar punonjësit e policisë.
Tv Klan