Arrestohet zjarrvënësi i pyjeve në Ballsh – (29 Gusht 2000)
Lajme Arkiva – TV Klan 2000
Arrestohet zjarrvënësi i pyjeve. Nuk kanë mjaftuar temperaturat e larta që flaka të ndez pyjet në jug të vendit. Rreth 5 hektar pyll në fshatin Kashtë të Ballshit, janë djegur plotësisht pas vënies së flakëve nga një banor i fshatit. Nuk dihet ende se nga ç’motiv është shtyrë 30-vjeçari Shkëlqim Shehu nga Ballshi për t’i vënë flakën pyllit, por zjarri i ndezur nga ai dje në mesditë ka shkrumbuar plot 5 hektar tokë pyjore.
Rasti i djeshëm ku njerëz të papërgjegjshëm djegin vetë pyjet nuk është i vetmi. Nuk ka vonuar policia e Ballshit që pas zbardhjes së ngjarjes të identifikojë zjarrvënësin dhe të arrestojë atë. Në shtëpinë e tij policia sekuestroi dhe materiale të tjera të vjedhura në ndërmarrjen e naftës në Ballsh.
Ndërkohë që zjarre të provokuara nga temperaturat e larta vazhdojnë ende, rasti i djeshëm i zjarrvënies me dashje nga një shtetas ka nxitur autoritet lokale, që edhe pse pa mjetet e domosdoshme të shtojnë masat mbrojtëse dhe mjetet parandaluese./tvklan.al
Gazetar – Eduart Frangaj