Arsenal jep 50 milionë euro për Icardin
Është kthyer në një çështje në mediat sportive italiane, një postim në Twitter i Wanda Nara, bashkëshortes e njëkohësisht agjentes së sulmuesit të Inter, Mauro Ikardi. Postimi ku ajo i uron miqve virtualë një ditë të mbarë, është bërë në Londër.
Kaq ka mjaftuar që gazetat kryesore në Itali të hamendësojnë për bisedime mes saj dhe londinezëve të Arsenal.
Sipas “Sport Mediaset”, topçinjtë janë të gatshëm të ofrojnë 50 milionë euro për shërbimet e bomberit argjentinas të zikaltërve, ndërsa për lojtarin është gati një kontratë prej 7 milionë eurosh në vit.
Inter nuk është i gatshëm të largojë Ikardin, por përpara një oferte si ajo e Arsenalit do të tundohej, shkruan “Gazzetta dello Sport”.
Aktualisht sulmuesi 23-vjeçar merr 3.8 milionë euro te Inter, por bashkëshortja-agjente e lojtarit ka bërë disa herë thirrje për rishikim të pagës, duke parë edhe interesimet e disa klubeve, si Atletiko Madrid, Juventus, apo edhe Napoli nëse largohet Gonzalo Higuain. /TV KLAN