Basha: Sipërmarrësit treguan sot se nuk do të heshtin para arbitraritetit
Kryetari i opozitës Lulzim Basha ka reaguar pas protestës së tregtarëve të biznesit të vogël kundër TVSH-së. Kreu i demokratëve nëpërmjet një postimi në rrjetin social Facebook thotë së biznesi i vogël është motori i çdo ekonomie dhe shoqërie.
“Futja e biznesit të vogël në TVSH është goditje që i bëhet biznesit, ekonomisë, dhe vetë Shqipërisë. Sipërmarrësit e vegjël janë motori i çdo ekonomie dhe shoqërie: ata krijojnë punësim, ata sjellin zhvillim, ata sjellin mirëqenie”.
Në protestën e zhvilluar 60 minuta, të pranishëm ishin dhe deputetë të Partisë Demokratike.
Mbrëmjen e së hënës PD zhvilloi mbledhje me dyer të mbyllura për më shumë se 90 minuta ku u vendos që deputetë të kësaj force politike të mbështesin protestën e biznesit.
Deputetet demokratë bojkotuan këtë të martë punimet e komisioneve parlamentare për t’iu bashkëngjitur protestës.
Statusi i plotë i Lulzim Bashës.
Futja e biznesit të vogël në TVSH është goditje që i bëhet biznesit, ekonomisë, dhe vetë Shqipërisë. Sipërmarrësit e vegjël janë motori i çdo ekonomie dhe shoqërie: ata krijojnë punësim, ata sjellin zhvillim, ata sjellin mirëqenie.
Nuk ka asnjë arsye ekonomike, asnjë arsye publike për vendimin e Edi Ramës kundër biznesit të vogël. Ka vetëm dy arsye private: favorizimi i oligarkëve dhe krijimi i kushteve për koncesionin privat të TVSH-së.
Sipërmarrësit e vegjël treguan sot në mbarë vendin se ata nuk do të heshtin para arbitraritetit, nuk do të lejojnë që bizneset dhe mundi i tyre të grabitet nga Edi Rama dhe klientët e tij.
Ata duan një Shqipëri ku ka mundësi, ku ka konkurrencë të ndershme, ku ka drejtësi.
Kjo Shqipëri do të jetë realitet vetëm kur politika të mos jetë e kapur, kur Shqipëria të çlirohet nga oligarkia politike dhe ekonomike.
Ky është vizioni dhe vullneti i Partisë Demokratike.
/tvklan.al