Besnik Mustafaj prezanton stafin për fushatën elektorale – (30 Gusht 2000)
Lajme Arkiva – TV Klan 2000
Kandidati i Partisë Demokratike për Bashkinë e Tiranës, Besnik Mustafaj, ka prezantuar stafin e tij të fushatës si dhe është njohur me 11 pretendentët për minibashkitë e Tiranës. Mustafaji tha, se është tepër i nevojshëm homogjenizimi i strategjisë së tij me këta kandidatë, duke vepruar gjatë fushatës në shërbim të njëri-tjetrit. Ai ka treguar sot hapat e veprimeve të stafit të tij elektoral deri në ditën e zgjedhjeve.
Besnik Mustafaj:- “Strategjia jonë për fushatën do të jetë një punë e përbashkët me 11 kandidatët. Një koordinim i punës së stafeve të secilit me stafin tim, për të shkuar në mënyrë të padiskutueshme tek çdo zgjedhës, tek ata që janë militantë PD, tek ata që janë të papërcaktuar edhe tek socialistët. Ne jemi të bindur se me atë çka i propozojmë popullit të Tiranës, një pjesë e mirë e elektoratit socialist do të votojë për ne”.
Sipas Mustafajit pa filluar ende fushata nga policia apo individë të caktuar, janë vënë re përpjekje për të krijuar incidente. Ne përfundoi ai, do të jemi të matur për të shmangur çdo lloj tensioni të provokuar./tvklan.al
Gazetare – Ornela Bego