Bolt kalon në gjysmëfinalen e 100 metrave
Usain Bolt, njeriu më i shpejtë në planet nuk e pati të vështirë të kualifikohet në gjysmëfinalen e garës së 100 metrave në botërorin e atletikës që po mbahet në Londër. Atleti xhamajkian kaloi i pari finishin në baterinë e tij me kohën 10 sekonda e 7 të qindat.
Bolt, i cili u duartrokit nga publiku, pritet ta ketë pak më të vështirë garën në gjysmëfinale dhe finalen e së shtunës. Kundërshtarët e tij kanë treguar në gjendje shumë të mirë.
I riu amerikan Christian Coleman në baterinë e parë e përfundoi garën në 10 sekonda e 01 të qindat, ndërsa amerikani tjetër Justin Gatlin që garoi në baterinë e pestë shënoi kohën 10 sekonda e 5 të qindat. Rivali kryesor i xhamajkanit është patrioti i tij Xhulian Forte që e përfundoi garën e baterisë së tretë me 9 sekonda e 99 të qindat. TV KLAN