Breshëri armësh drejt një servisi në Tiranë
Dy persona janë shoqëruar nga Policia pas dyshohet se kanë qëlluar me armë zjarri kundër një servisi makinash në Qafë-Kashar. Në një njoftim për mediat, Policia e Tiranës bën me dije se ngjarja ka ndodhur rreth orës 04:10 të mëngjesit të kësaj të shtune.
Autoritetet shtojnë se autorët kanë qenë duke lëvizur me një makinë dhe kanë hapur zjarr, por fatmirësisht ka vetëm dëme materiale.
“Menjeherë pas marrjes së njoftimit, shërbimet e Policisë u vunë në ndjekje të mjetit të dyshuar ku në bashkëpunim dhe me Policinë e Durrësit, në vendin e quajtur “Ura e Dajlanit” u bë kapja e dy personave të dyshuar të ngjarjes”, vijon njoftimi.
Ndërkohë efektivët e policisë “janë duke ushtruar kontroll të banesave të këtyre shtetasve si dhe vijon kontrolli në rrugën interurbane Tiranë-Durrës pasi dyshohet se gjatë ndjekjes nga Policia këta shtetas kanë hedhur armën e zjarrit në rrugë”.
Çështja ende është në hetim dhe Policia e Tiranë nuk jep të dhëna për identitetin e personave të dyshuar./tvklan.al