• Shpërndaje

 Programi “Historia ime”, në Tv Klan solli ditën e sotme historinë e vështirë të nënës së dy fëmijëve. Ajo tregoi se para 9 vitesh si pasojë e një grindje me bashkëshortin dhe dhunës që ai ushtroi ndaj saj dhe fëmijës 4 vjeç, vendosi të largohet nga shtëpia dhe të shkojë tek prindërit.

Kur u largua ishte 4 muajshe shtatzënë dhe që nga ai moment nuk ka patur asnjë kontakt me bashkëshortin. Ai nuk interesohet për fëmijët dhe nuk ka shkuar të takojë edhe djalin e vogël, ku erdhi në jetë.

Edhe sot, ai dhe familja e tij nuk e njohin vogëlushin.

Mirela Milori: Gjatë këtyre viteve që ti u ktheve në shtëpinë e babait, i ati telefonon që të pyesë për fëmijët?

Gruaja: Jo asnjë gjë. As një ditëlindje t’i thotë të birit, atij që e la 4 vjeç.

Mirela Milori: Gëzuar ditëlindjen, nuk e ka bërë?

Gruaja: Jo asnjë gjë!

Mirela Milori: Po djalin e vogël e ka takuar?

Gruaja: Jo, djali i vogël nuk e njeh, e ka lënë 4 muaj e gjysmë në bark.

Mirela Milori: Nuk e ka parë asnjëherë djalin e vogël?

Gruaja: Jo asnjëherë!

Mirela Milori: Po njerëzit e tij?

Gruaja: As njerëzit  e tij, as nuk janë interesuar. Kam patur numrin e kunatës së madhe e kam marrë në telefon, kur kam shkuar tek materniteti të lind. Ka ardhur atë ditë dhe pastaj nuk ia kam parë më fytyrën.

Mirela Milori: Nuk kanë ardhur ta shohin nipin e vogël?

Gruaja: Jo, as nuk e njohin se si është!

Mirela Milori: Ju jetoni larg me shtëpi nga shtëpia e bashkëshortit apo në një fshat?

Gruaja: Jemi pak larg!

Mirela Milori: Po vjehrri, vjehrra nuk kanë pyetur për këta nipër?

Gruaja: Jo, jo. Një fjalë të mirë nuk e di prej tyre, lëri gjërat e tjera. Edhe kur shkoja t’i thoja ndonjë gjë, mbylle gojën më thoshte mua, është burrë e di vetë. Ti ta mbyllësh gojën t’i shërbesh si do ai. Është burrë, e di vetë.

Mirela Milori: Ka krijuar familje të re?

Gruaja: Nuk e di!

Mirela Milori: Kontaktet e fundit që ke dëgjuar për të? Ku është, është në fshat apo ka ikur?

Gruaja: Vëllai i madh e gjeti në Facebok dhe ai i tha të thyejë qafën me gjithë ata. Nuk më interesojnë se ku janë, as ajo dhe ata që ka pas vetes./tvklan.al