Video: Burri vret me mjete të forta gruan
Një tjetër vrasje i shtohet kësaj të premteje, që pa frikë mund të konsiderohet e zezë.
Një grua në Durrës ka rënë pre e dhunës së bashkëshortit të saj, i cili i ka marrë jetën duke e goditur me mjete të forta.
Burime zyrtare sqarojnë se 40-vjeçarja Adriana Shaholli, banuese në lagjen Nr.15 të qytetit bregdetar, ka shkuar në urgjencën e spitalit rreth orës 19:55. Ajo mësohet se kishte dëmtime në kokë dhe pavarësisht ndërhyrjes së mjekëve nuk ka mundur të mbijetojë dhe ka ndërruar jetë.
Policia sqaron se
“nga hetimet e kryera ka rezultuar se autor i dyshuar është bashkëshorti i saj Çlirim Shaholli 42 vjeç, i cili e ka goditur me mjete të forta”.
Bashkëshortët Shaholli, të cilët kanë 6 fëmijë, mësohet se në momentin e krimit ndodheshin të vetëm në shtëpi. Nuk dihet ende shkaku i kësaj ngjarjeje të rëndë, por burime për tvklan.al thonë se ata kishin pasur konflikte të vazhdueshme kohët e fundit, për shkak të gjendjes së vështirë ekonomike.
42-vjeçari është shoqëruar në ambientet e Policisë së Durrësit dhe po pyetet mbi rrethanat e ngjarjes. Hetimet për zbardhjen e plotë të kësaj vrasjeje vijojnë.
Po këtë të premte, gjatë orëve të para të mëngjesit, një 19-vjeçare gjeti vdekjen në zonën e “Don Boskos” në kryeqytet, pasi u qëllua për vdekje nga ish-i dashuri i saj. Pasi i mori jetën Xhuljeta Çunit, 31-vjeçari Xhafer Mata e drejtoi armën nga vetja duke u vetëvrarë me një plumb në kokë. Dyshimet janë se shkak për ngjarjen e rëndë është bërë ndarja mes tyre, pak muaj më parë.
/tvklan.al