• Shpërndaje

Gjatë emisionit “Rudina” në Tv Klan, Rudina Dembacaj foli edhe rreth eksperiencës së saj të deritanishme në spektaklin e humorit “Klanifornia”. Aktorja veçoi kiminë artistike me Visjan Ukcenajn, ndërsa tha se është surprizuar nga atmosfera e përgjithshme pozitive me të gjithë.

Rudina Magjistari: Role të ndryshme, personazhe të ndryshëm, batuta shumë të bukura, the që po ndihesh shumë mirë në këtë spektakël.

Rudina Dembacaj: Në fakt, nuk e di nëse ia kam thënë live, por arsyeja kryesore pse unë doja të vija në “Klanifornia” ishte Visjan Ukcenaj sepse unë me Visjanin, kur isha njëherë e ftuar në “Klanifornia”, kuptova që kemi shumë kimi artistike, të cilën është shumë vështirë ta gjesh. Dyshen me Visjanin e kisha të sigurtë që do të ecte, por që do kaloja kaq mirë me të gjithë artistët aty, me të gjithë aktorët, nuk e prisja dhe jam shumë e surprizuar, por edhe nga Turjani që është një menaxher i jashtëzakonshëm dhe nga atmosfera brenda, kam kuptuar që ne artistët, duke qenë shumë emocionalë, thjesht duam menaxhim se jemi rob të mirë të gjithë në fund të ditës.

Rudina Magjistari: Aty po ndihesh mirë dhe unë uroj që të të shkojë shumë mbarë, ta shijosh këtë sezon deri në fund.

Po në ditën e dasmës, a pushoi nga xhirimet Rudina Dembacaj?

Rudina Dembacaj: Mezi pres këtë të shtunë sepse duke qenë se dasma mbaroi kemi më shumë role.

Rudina Magjistari: E keni përfshirë si ngjarje?

Rudina Dembacaj: Jo, jo.

Rudina Magjistari: Ndërkohë xhirimet i ke bërë më herët? Si funksionon, si regjistroni?

Rudina Dembacaj: Ne xhirojmë çdo të premte, sot ishim në provë gjenerale.

Rudina Magjistari: Ditën e dasmës e ke bërë pushim?

Rudina Dembacaj: Të enjten e shkuar unë xhirova “Opinionin” e “Klanifornias” që isha në rolin e zonjës Jozefina Topalli dhe kisha vetëm një rol javën që shkoi. Pastaj, të shtunën pas dasmës, thashë “Ua, po unë si nuk xhirova nja dy të tjera?” Ndihesha si bosh sepse vërtet po e shijoj shumë dhe në fund fare, ndihem tamam në lëkurën time, kabareti është tamam, por sidomos “Klanifornia” që ke mundësi të shpërfaqesh në role të ndryshme çdo javë./tvklan.al