Dita e derbit të Italisë
Derbi i Italisë do të ndezë sot prej orës 18:00 në “San Siro”. Inter do të presë Juventus në javën e katërt të Serie A. Zikaltërit vijnë në këtë përballje pas një humbje befasuese në Europa League me Hapoel Beer Sheva.
Në kampionat Inter synon fitoren e dytë radhazi, por ndaj një kundërshtari që zotëron futbollin italian në vitet e fundit.
Mediat italiane shkruajnë se Frank de Boer është në rrezik pas një nisje të ngadaltë të sezonit. Bardhezinjtë e drejtuar nga Massimiliano Allegri janë me pikë të plota në kampionat, por nuk arritën të tregonin të njëjtën forcë pak ditë më parë edhe në Champions League ku barazuan pa gola me Sevilla.
Sezonin e kaluar Derbi i Italisë përfundoi pa gola në Milano dhe me fitoren e Juventus në Torino. Sfida e sotme do të jetë një duel edhe mes Mauro Icardi dhe Gonzalo Higuain, protagonistë në kampionatin e kaluar. Të dy e kanë nisur mbarë këtë sezon dhe kjo paraprin një sfidë plot emocione. /TV KLAN