Drogë nga Shqipëria drejt Italisë, arrestohen 15 persona
15 të arrestuar është rezultati i një hetimi të nisur një vit më parë nga autoritetet italiane, që çoi në shkatërrimin e dy grupeve kriminale, të specializuar në trafikun e drogës me Shqipërinë.
Urdhër arrestet u ekzekutuan mëngjesin e kësaj të mërkure në Brindisi, Oria, Fasano dhe Catania. Sipas mediave fqinje, gjatë hetimeve janë kapur sasi të mëdha marijuane ndërsa janë arrestuar 4 trafikantë droge.
“Hetimet nisën në Shkurt të 2017-s dhe u përmbyllën në Gusht. Falë tyre u bë i mundur dhe zbulimi i këtyre dy grupeve të cilët trafikonin drogë që vinte nga Shqipëria. Gjatë kësaj kohe janë sekuestruar 800 kilogramë marijuanë dhe janë arrestuar në flagrancë 4 trafikantë”
, shkruan e përditshmja “La Repubblica” .
Të arrestuarit, identiteti i të cilëve ende nuk bëhet i ditur, akuzohen për disa vepra penale, si trafik droge, grabitje e posedim armësh.
/tvklan.al