Emri/ Arrestohet polici i Delvinës për lidhje me kanabisin
Një efektiv i policisë në komisariatin e Delvinës u arrestua pasditen e së mërkurës nga kolegët e tij i dyshuar për lidhje me kultivuesit dhe trafikantët e kanabist. Në pranga ka rënë 32-vjeçari Shpëtim Kripa me detyrë specialist për Hetimin e Krimeve, në Komisariatin e Policisë së Delvinës.
Hetimet u kryen nga Shërbimi për Çështjet e Brendshme dhe Ankesat në bashkëpunim me Prokurorinë e Sarandës.
Dyshimet janë se ky punonjës policie në disa raste ka bashkëpunuar me persona të përfshirë në kultivim, magazinim dhe trafikim të lëndëve narkotike në zonën e Sarandës dhe Delvinës.
32-vjeçari dyshohet se u jepte këtyre personave informacion mbi veprimet e policisë që kryheshin kundër kultivimit dhe trafikut të lëndëve narkotike. Po hetohet nëse ka të tjerë efektivë policie të përfshirë në këtë aktivitet të paligjshëm.
Ndërkohë mësohet se policia ka nisur edhe një operacion për goditjen e kultivimit dhe trafikun e lëndëve narkotike në fshatrat e Vlorës. Forca te shumta te Ndërhyrjes së Shpejtë, Repartit DELTA dhe policisë kufitare kontrolluan territorin e disa njësive administrative për identifikimin e zonave të kultivuara me Kanabis. Kontrollet u përqendruan në Novosele, ku në vitin 2016 u zbuluan parcela të shumta me kanabis. Policia ka kontrolluar edhe banesa të braktisura, objekte, bunkerë apo vende të tjera që mund të përdoren nga trafikantët për të kultivuar apo fshehur drogën.
Tv Klan