Fest Folk Ndërkombëtar në Gramsh – (24 Gusht 2000)
Lajme Arkiva – TV Klan 2000
Fest Folk Ndërkombëtar në Gramsh. Bashkia dhe këshilli i rrethit Gramsh me iniciativë të grupit folklorik “Miqësia”, për tre net me radhë organizuan në këtë qytet Fest Folkun e parë Ndërkombëtar. Merrnin pjesë grupi folklorik nga Orjahova Bullgari, grupi folklorik i Stugës Maqedoni, ndërkohë që ishin shtatë të ftuar të tillë.
Sipas drejtuesit të festivalit, qëllimi i organizimit të këtij aktiviteti kishte të bënte me vazhdimin e projekteve për çarmatimin në këtë rreth. Edhe pse u trumbetua me të madhe organizimi i festivalit nuk e justifikoi zhurmën e bërë. Fondi prej 500 mijë lekësh të reja të akorduar nga bashkia qe i pamjaftueshëm për mbarëvajtjen e aktivitetit.
Në fund të Fest Folkut, si grupi më i mirë u shpall grupi folklorik “Miqësia”, nga qyteti i Gramshit. Ndonëse ishte hera e parë dhe festivali folklorik nuk shkoi ashtu siç pritej, drejtuesit vendor i premtuan popullit të Gramshit që në të ardhmen do të organizojnë festivale të tjerë të këtij lloji për t’i kthyer ato në traditë./tvklan.al
Gazetar – Eduart Frangaj