Fiera del Levante në Tiranë – (20 Tetor 1999)
Arkiva Lajme – Tv Klan 1999
Fiera del Levante nesër në edicionin e dytë të saj. Në një konferencë për shtyp sot komisari jashtëzakonshëm Francesko Divella ka shpjeguar qëllimet e evenimentit më të rëndësishëm ekonomik të vitit në Shqipëri. Panairi i Fiera del Levante i cili do funksionojë jo vetëm për biznesmenët do jetë i hapur prej datës 21-25 Tetor.
Sipas Divellas janë dyfishuar sipërfaqet ekspozuese dhe firmat pjesmarëse. Këtë radhë do ketë prodhime të ekspozuara jo vetëm nga Italia e Shqipëria, por dhe nga Bullgaria, Greqia, Kroacia, Maqedonia dhe Rumania. Fiera del Levante kërkon të jetë ura lidhëse jo vetëm mes rajonit të Pulias dhe Shqipërisë por në kuadrin e Korridorit 8, pika e lidhjes mes Detit të Zi dhe Adriatikut.
Panairi do shtrihet në tre ambjente ekspozuese, në Pallatin e Kongreseve, në Qendrën Ndërkombëtare të Kulturës dhe në Qendrën e Panaireve. Në ceremoninë përuruese të edicionit të dytë të Fiera del Levantes do marrin pjesë edhe kryeministrat e dy vendeve, Masimo D’alema dhe Pandeli Majko./tvklan.al