Foto/ 50 mijë € fitime nga shitja e drogës, ja fletorja e shënimeve për dozat
Shtatë persona u arrestuan nga policia e Tiranës në operacionin e koduar “Tangent”. Në pranga përfundoi edhe i forti i “Myslym Shyrit”, Gjergj Cukali, një emër i njohur për policinë.
Por Televizioni Klan ka mësuar se Vjollca Gjoka ishte ajo që mbante shënimet për shitjen e drogës, që do të thotë një bashkëpunëtore e ngushtë e 37-vjeçarit Gjergj Cukali.
Këto foto tregojnë fletoren që mbante 46-vjeçarja ku tregohet se sa doza kokainë shiteshin gjatë një muaji. Kështu në muajin mars të këtij viti ishin shitur 129 doza, në muajin prill 103 doza.
Vetëm në 10 ditët e para të muajit korrik ishin shitur 31 doza. Sipas policisë fitimet mujore të këtij grupi, nga shitja e drogës, ishin 50 mijë euro./tvklan.al