Foto/ Nxirret nga lumi furgoni i pasagjerëve
Pas më shumë se 12 orësh është nxjerrë nga lumi i Zall Bastarit furgoni i pasagjerëve që u bllokua pasditen e djeshme.
Furgoni tip "Benz" u nxorr nga vërshimet e lumit me ndihmën e mjeteve të administratorit të Njësisë Zall Bastar. Vërshimet e lumit që u rritën për shkak të reshjeve të shiut, bllokuan furgonin që po transportonte pasagjerë dje rreth orës 18:00 në Zall Bastar, këtu në kryeqytet.
Fatmirësisht pasagjerët dhe shoferi mundën të dilnin nga mjeti dhe shpëtuan pa asnjë lëndim. Moti i keq kishte rritur prurjet në këtë lum, duke e bërë të pamundur kalimin në anën tjetër.
Banorët e kësaj komune kanë denoncuar vazhdimisht shembjen e urës. Edhe emisioni investigativ "Stop" në Tv Klan trajtoi këtë problematikë muajin e kaluar, ku për shkak të shembjes së urës, banorët rrezikonin jetën duke kaluar mes për mes lumit. /tvklan.al