Foto/ Si u zbuluan korrierët e heroinës në dhomën e tragetit
Për të trafikuar 2.3 kilogram heroine drejt Italisë, Laureta Lama, kjo 38 vjeçare që shihni në ketë foto të siguruar nga Tv Klan, kishte marrë me vete edhe dy fëmijët e saj. Ajo po udhëtonte së bashku më të dashurin drejt Italisë me tragetin e linjës Durrës – Bari.
Edhe Bashkim Hasani, 67 vjeç, të cilin e shihni në këtë foto, u arrestua në flagrancë në dhomën e tragetit ku u gjet droga. Me drogën në valixhe, Lama i ka kaluar të gjitha kontrollet.
Por një informacion i marrë në rruge operative ka ngjitur në dhomën e tyre efektivet e antidrogës dhe të policisë kufitare. Destinacioni i drogës ishte Bolonja. Lama dhe Hasani ishin korrierë.
Tv Klan mësoi se ata pranuan para policeve se këtë rrugë e kishin bërë edhe herë të tjera, ndërsa fillimisht u shprehen se po shkonin për një vizitë tek një e afërme e 38 vjeçare në Bolonja.
Policia shpalli në kërkim Erlin Çaushin, 29 vjec, nga Mezezi i Tiranës. Droga, sipas hetuesve, do të trafikohej për llogari të tij, ndërsa pritësi i saj nuk dihet ende.
Pas ndalimit të korrierëve, policia ushtroi kontroll në shtëpinë e Çaushit në Tiranë ku gjeti këtë pistolete tip Glok, ndërsa 29-vjeçari ishte larguar.
Për armën pa leje u arrestua babai i tij, Kujtim Çaushi, që po shihni në këtë foto. Hetimet për të zbardhur rrjetin e këtij trafiku do të ndiqen nga prokuroria, e cila ka ngritur akuzat për trafik ndërkombëtar të lëndëve narkotike. / TV KLAN