“France Football” vlerëson paraqitjen e Ledian Memushajt në ndeshjet e treta
Për revistën “France Football”, lojtari vendimtar në suksesin e skuadrës kuqezi, në fitoren kundër Rumanisë ishte Ledian Memushaj. Për këtë arsye, media prestigjoze e futbollit botëror, i ka dhënë mesfushorit një vend në formacionin më të mirë të ndeshjeve të treta në grupet e Kampionatit Europian. Memushaj është vlerësuar me notën e lartë 7 nga kjo revistë.
Në përshkrimin e saj për futbollistin shkruhet se, pasi ishte vendimtar në ngjitjen e Peskarës në Serinë A, Memushaj konfirmoi këtë pozicion edhe në Euro 2016.
Ai dha harkimin perfekt në golin e shënuar nga Sadiku, në fitoren që i lejoi Kombëtares Shqiptare të shpresonte deri në fund për t’u kualifikuar në fazën tjetër të turneut.
Një vlerësim i rëndësishëm ky për Ledian Memushaj, aq më tepër që vjen nga revista që konsiderohet si “bibla” e futbollit.
Në formacionin më të mirë të ndeshjeve të fundit në grupet e Euro 2016, mesfushori i përfaqësueses shqiptare është vendosur krah emrave të mëdhenj si Cristiano Ronaldo, Ivan Perisiç apo edhe Aron Ramsei, që ndihmoi në kualifikimin historik të Uellsit në fazën tjetër të Euro 2016.
Tv Klan